今次我會將三晚既演唱會濃縮成一篇俾大家欣賞，除左希望一Ｄ去唔到現場睇GIGI既FANS可以感受一下當晚既氣氛外，亦希望透過文字將GIGI既演唱會記錄下來，永遠刻在大家既心坎中。(嘟嘟字)
2002年1月3日至5日，對GIGI梁詠琪黎講，係一個非常重要既日子，因為呢一日，係GIGI入行以黎首次係紅館開既個人演唱會，係萬眾期待既日子。當晚，仲未到八點，已有好多觀眾、FANS等入場，亦有好多人係入場之前，拎住係廣東碟入面張換領券去館門外換領GIGI既演唱會海報，以及購買螢光棒。其後人群陸續入場，全場差唔多爆滿，之後，場內既燈光突然熄掉，大家即時歡呼叫喊，大叫GIGI個名，有Ｄ就吹BB，仲係咁搖住手上既螢光棒，氣氛極度熱烈！
千呼萬喚，我地既主角GIGI終於出場！
GIGI慢慢由台下升上黎(當時佢企左係一個好高既台上)，手上帶住拳套，擺出準備打拳既姿勢，真係好有型，然後慢慢走到台中，而一班舞蹈藝員亦同GIGI一樣帶住拳套，一句「字母眾多…」揭開左全晚序幕！GIGI一邊唱「G
FOR GIRL」，一邊配合以打BOXING既跳蹈，當時有好多人唔單止大叫，仲興奮到企晒起身添！
唱完「G FOR GIRL」之後，GIGI就同全場觀眾打招呼喇，之後，GIGI講左一段心底說話，佢話：「等左六年，我終於開到自己既個人演唱會！」講完呢句之後，GIGI已忍唔住喊左出黎，當時觀眾都好感動，因為我相信有好多人都有同樣既感覺，就係：我地都等左六年！
講完呢番說話之後，GIGI就入後台換衫，呢個時候，螢光幕就播左一ＤGIGI圈中好友既說話，好似有吳鎮宇、吳君如、莫文慰、張達明，同埋古天樂既！主題原本係估緊GIGI下一PART會著乜野衫，但佢地都好攪笑，猛用EKIN同GIGI黎開玩笑，好似張達明話：「我成日見到GIGI同EKIN係西貢滑水架，當時GIGI都著得好少，少成點？好少囉！一陣GIGI最好就衫少D啦！例如好似用兩隻豉油碟遮住咁囉！」播完片後， GIGI已換好衫，就換左一套好性感，露晒成個背脊，又有Ｄ似野生動物既衫，為左配合番「出走地平線」呢首歌！之後，GIGI一連串唱左幾首係卡拉OK好HIT慢歌，分別係「死心場地」、「限期」及「她喜歡的是你」。
係第二場既時候，GIGI唱完以上既歌，就扯左坐係台下既古天樂上台！當時全場觀眾情緒高漲，大叫古仔個名，GIGI又大讚古仔著得好靚好型仔！古天樂一場黎到，當然唔會空手黎，為左配合佢地一齊合作過既電影「絕世好BRA」，古仔帶左幾個不同款式既BRA俾GIGI，有喱士、豹紋等。跟住古仔就拖住GIGI唱左首「男朋友」。
大家都知道GIGI識得彈琴架喇，係演唱會當然唔少得自彈自唱既一PART；GIGI穿上全身白色既連身裙，好似白雪公主咁純潔美麗！首先用一個好細既玩具鋼琴，彈出「幾分鐘的約會」，之後就用正真既雪白色既鋼琴，邊彈邊唱咁唱出GIGI既偶像林億蓮既「至少還有你」。
係第三場演唱會時，正當GIGI唱得好投入咁彈緊「至少還有你」既時候，喇叭忽然傳出另一把清脆既女聲伴著GIGI既歌聲，呢個時候，GIGI鋼琴附近的舞台慢慢升起，台中企左一個女人，當時唔單止GIGI，全場觀眾都好愕然，因為，呢個人就係GIGI既偶像──林億蓮！GIGI當睇係憶蓮既時候，真係驚喜到彈起身，然後與億蓮送左紮花俾GIGI，兩人再互相擁抱，GIGI仲即時喊左出黎添！佢好感動咁話：「點解你會黎架？你係我偶像黎架麻，點解你會黎既？」跟住GIGI就拖住億蓮隻手，慢慢行到台中，眼淚依然繼續流，憶蓮見到GIGI喊，亦一齊喊，跟住GIGI又話：「我一直都好鍾意你架，每一次演唱會，無論大定細，我都一定會唱你既歌架．．．咦，我見到你就話喊o者，點解你又喊？」憶蓮話：「我見到人喊，我就會喊架喇！」跟住憶蓮繼續話：「其實，呢幾年我一直都有留意你(指GIGI)，你一直係度進步．．．」GIGI聽左之後，開心到想暈！到憶蓮話要番落台，GIGI好唔捨得，仲話要錫佢兩啖先肯放佢走添！場面真係好感動，我地都好戥GIGI開心！真係可以話係夢想成真！
開心完一輪之後，GIGI真係暈暈地，連自己唱乜歌都唔記得，哈！在樂隊彈出音樂後，GIGI先記起，隨後就唱出「迫不得已」。
GIGI為照顧山頂既觀眾，係唱兩首國語歌「短髮」及「膽小鬼」時，就坐上一舊雲上面唱；舊雲唔單止會升高，而且仲會繞著全場咁行，等到四面既觀眾都可以欣賞到GIGI個靚樣！GIGI一邊唱，全場既螢光棒一齊揮動，好似天上Ｄ星星咁，真係好靚好靚！見到Ｄ人反應咁熱烈，有咁多人支持GIGI，我睇到都好感動~~
其實一個演唱會，舞蹈藝員亦扮演著非常重要既角色；今次GIGI演唱會，總共有十多位女舞蹈藝員，佢地都表現得好專業，係跟住黎既呢一PART，GIGI在後台換衫時，一批舞蹈藝員著住好性感既服裝，擺出誘惑既姿態，為GIGI跟住既一首風格獨特兼新嘗試既歌曲──「驗光」伴舞。為配合首歌既感覺，GIGI都著得頗性感，仲一邊唱，一邊慢慢將件衫逐Ｄ逐Ｄ扯落，最後露出整個背脊及大腿，真係無論男女都睇到流鼻血。唱完「驗光」後，GIGI再唱出「繼續愛」(第二場變左唱「煙霧迷漫」)。
唱完呢幾首歌，GIGI又入後台換衫喇，今次畫面上播左一Ｄ台底春光喇！GIGI就黎出場前，就要求大家熱烈Ｄ歡迎佢出場，全場即報以熱烈歡呼聲！之後台慢慢升上黎，不過出場既唔係GIGI，係第一晚既特別嘉賓──SAMMI鄭秀文。當時大家都好興奮，歡呼聲如雷貫耳， 跟住SAMMI就同GIGI合唱左「終身美麗」；SAMMI仲帶左份禮物送俾GIGI添，就係一大包「伊麵」喇！哈哈，GIGI好開心咁接左，仲對住SAMMI話：「你真係知我心意！」SAMMI一場黎到，當然唔會只唱一首歌啦，佢仲特登唱左首GIGI作俾佢既歌「跳傘」。
而第二晚既特別嘉賓就係SAMMI既好朋友──許志安。安仔同GIGI其實已識左好耐，由GIGI拍第一套電影「流氓醫生」時開始識，之後安仔又搵GIGI做「心血」MTV女主角，所以佢地都好熟！GIGI同安仔合唱左卡拉OK勁HIT既「會過去的」，然後安仔獨唱左「爛泥」。
第三晚既特別嘉賓就係──ARRON郭富城。係AARON出場時，全場觀眾都好驚喜，因為大家都無諗過係佢；GIGI同ARRON一齊合唱左「Para Para Sakura」，GIGI仲跟住ARRON一齊跳，但GIGI卻跳了AARON「對你愛不完」的舞步喎，好攪笑！然後AARON獨唱首新歌「被愛」。
GIGI係籌備呢個演唱會已，已透露過會跳一PART西班牙舞，而跟住黎既一PART，GIGI就著上一套好型，又少少男性化既服飾，一邊跳西班牙舞，一邊唱出「Cover Girl」及「我@你」。
為左令GIGI更有投入感，GIGI既演唱會都落足心思，除左大送名貴禮物，例如FANCL一萬蚊禮券、手提電話及浪琴鑽石腕錶外，仲會每晚抽出一位觀眾，係GIGI邊唱「至死不遇」時，邊同GIGI跳貼身舞。係第一晚抽左一個女仔，GIGI唔單止拖住佢隻手跳「探戈」，仲….仲….同幸運兒相擁，將佢個頭攬在胸前，又坐落觀眾個大腿上，全場觀眾真係又羨慕又妒忌，我就直頭睇到「眼火爆」！
演唱會當然唔少得既係握手環節，GIGI邊唱「Kiss Me」、「我鍾意」邊同觀眾握手，大家為左可以掂到GIGI隻手，都係咁迫，真係迫到透唔到氣呀！估唔到大家對GIGI咁狂熱！
GIGI今次演唱會既服裝，真係靚到絕！而我最欣賞的就係跟住出場既公主裝，似十幾世紀歐洲既公主服裝，裙上有一D油畫既圖案，閃閃發光，裙既後面有一個蝴蝶結，結上有一個好似上鍊公仔既鍊，頭戴小皇冠，真係好似一個童話小公主咁！好可愛，好美麗！GIGI唱住咁靚既服飾，「新居」、「I’ll Be Loving You」、「愛自己」及「嫌棄」。係唱「嫌棄」前，GIGI講左段好感性既說話，佢話：「呢幾年發生左好多事，我曾經以為梁詠琪已經玩完．．．但我知道，無論人地幾咁嫌棄你都好，自己唔可以嫌棄自己．．．」講完之後，GIGI都眼泛淚光。
GIGI企係台中，忽然唱出「一個為你甘你去蹈火海的人」，係第一晚，鄭伊健剛剛坐係我地前面，係GIGI唱呢首歌時，全場觀眾自然大叫EKIN個名；到GIGI唱完後，大家都要求EKIN上台，可惜EKIN一直坐係度，不過觀眾無放棄，一直大叫佢個名，又用雙腳踏地，好哄動，務求迫到佢上台！人群既力量真係不可擋，最終EKIN敵不過1萬2千人既叫喊，乖乖上左台！之後EKIN話：「上我就上左了，你地想點丫？」當時大家心情仲好興奮，不停大叫佢地個名，都唔係好聽到到EKIN講乜，跟住佢接住話：「俾我講番句野先！今次我黎係為了支持我女朋友，我覺得GIGI今次既演唱會真係好成功．．．」EKIN就完就返回後台了。之後，GIGI就講出心底話：「一齊經歷好多野，而家得到大家認同，好開心！」之後GIGI就唱出「Today」，全場觀眾亦同GIGI一齊合唱添！
ENCORE後，GIGI唱出兩首對GIGI黎講好有意義既歌，分別係「花火」及「灰姑娘」；GIGI係唱「花火」前，話：「好多謝SAMMI係佢自己既演唱會場場都唱出呢首歌，令我既創作路上打左一支強心針！」最後，GIGI唱出最後一首歌「灰姑娘」，演唱會正式圓滿結束！
